ஞாயிறு, மார்ச் 13, 2016

கருணாகரன்

முடி திருத்துகையில்
மகனுக்குக் கழுத்தருகில் கத்தி பட்டதால்
கீறல் விழுந்த கோபத்தில்
கடைக்காரரைக் கண்டமேனிக்குத் திட்டி
கடுமையாகச் சண்டை போட்டு
அப்படியே அடுத்த கடைக்குப் போய்
இளங்குட்டியாகப் பார்த்து
கண் முன்பே கரகரவென்று கழுத்தறுப்பதைப் பார்த்து
பிள்ளைகள் சாப்பிட வசதியாக
நல்ல கறியாகப் பிரித்து
ஒன்றரைக் கிலோ வாங்கிக் கொண்டு
வீடு திரும்பிக் கொண்டிருக்கிறார்
கருணாகரன்...

4-7-8

ஏதோவொரு வகையில் நம் வாழ்க்கையை மாற்றுகிற பழக்க வழக்கங்களைக் கற்றுக் கொடுப்பதுதானே கல்விகளில் எல்லாம் தலையாயது. அப்படியான ஒரு பழக்கத்தைச் சமீபத்தில் படித்து விட்டு, சொல்ல முடியாத அளவு மகிழ்ச்சியில் திரிகிறேன் கடந்த சில வாரங்களாக. அது யாது? படுக்கையில் படுத்ததும் தூக்கம் வராமல், பல மணி நேரம் புரண்டு புரண்டு படுப்பவரா நீங்கள்? அதற்குப் பெரும் காரணம், முடிந்து போன அன்றைய நாளின் சிந்தனைகள் முழுமையடையாமல் எச்சங்களாய்த் தொக்கி நிற்பதே. தொக்கி நிற்கும் எது பற்றியும் கவலைப் படாமல், ஆஃப் பட்டனை அழுத்தியதும் தூங்கி விடும் நம் அழகுக் கணிப்பொறியைப் போல நாமும் தூங்கி விழுந்து விடுவதற்கு எளிய வழி ஒன்றை முனைவர். வெய்ல் என்பவர் கண்டுபிடித்திருக்கிறார் (இதெல்லாம் நம் முப்பாட்டன் கண்டுபிடித்ததுதான் என்று ஆவணம் வைத்திருப்பவர்கள், வெள்ளைக்காரருக்கு மரியாதை செய்து விட்டமைக்கு மன்னித்தருள்க). எனக்குப் பெரும் உதவியாக இருந்த இந்தப் பழக்கம் என் போன்ற பலருக்குப் பெரும் வரப்பிரசாதமாக அமையும் என்ற நம்பிக்கையிலேயே அது பற்றிப் பகிர்ந்து கொள்ள விரும்புகிறேன்.

ஒன்றுமில்லை. இது ஓர் எளிய மூச்சுப் பயிற்சி. நான்கே நான்கு முறை இதைச் செய்தால், அடுத்த ரீலை ஓட்டத் தொடங்கும் முன்பே உறக்க தேவதை தழுவிச் சாய்த்து விடுகிறாள். பயிற்சியானது... மிக மிக எளிது. அதன் பெயர் 4-7-8 என்று இட்டிருக்கிறார். அதாகப்பட்டது... நான்கு வினாடிகள் மூச்சை அமைதியாக உள்ளிழுத்து, ஏழு வினாடிகள் மூச்சடக்கி, எட்டு வினாடிகள் சத்தமாக வெளியிட வேண்டும். இதை நான்கே நான்கு முறை செய்தால் போதும். நான்காம் முறை செய்யும் முன்பே ஒரு அருமையான கொட்டாவி வரும். அந்த முதல் கொட்டாவி வரும் போது, முனைவர் வெய்லுக்கும் எனக்கும் ஒரு நன்றி சொல்வீர்கள் பாருங்கள். அதற்காகவே வாழலாம் ஆயிரம் ஆண்டுகள். இது எனக்கு மெய்யாலுமே வேலை செய்தது. உங்களுக்கும் செய்யும் - செய்ய வேண்டும். அப்படிச் செய்யா விட்டாலும், பயப்பட வேண்டாம். பழகப் பழகப் பலருக்கும் தூக்கம் வரும் என்றே சொல்லப்பட்டிருக்கிறது. அதற்கு மேலும் புரண்டு புரண்டே படுத்துக் கொண்டிருந்தீர்கள் என்றால், உங்களுக்காக எம் ஆழ்ந்த இரங்கல்கள். இதை முயன்று பார்த்துவிட்டு, நாளை காலை எழுந்ததும் என்னைப் போலவே மகிழ்ச்சியில் தங்கு தங்கென்று குதிக்கத் தோன்றினால், இந்தத் தகவலுக்குக் கீழே வந்து ஒரு கருத்து மட்டும் போட்டு விட்டுப் போங்கள். இந்த உலகத்தில் நாமும் நாலு பேர் வாழ்க்கையை மாற்றி விட்டோம் என்ற நிம்மதியில் நாளையும் நல்ல தூக்கம் கிட்டும். அதுவே 4-7-8-இன் உதவியில்லாமலே நடந்து விட்டால் நல்லதுதானே!

யாருக்குய்யா வேணும் அப்பிடி ஒரு குறுக்கு வழித் தூக்கம் என்போர் மன்னித்தருள்க. கூடிய விரைவில் உங்களுக்குப் பிடித்த மாதிரி வேறு ஏதாவது கிடைத்தால் வந்து சொல்கிறேன்!

http://www.drweil.com/drw/u/VDR00160/Dr-Weils-Breathing-Exercises-4-7-8-Breath.html

புதன், மார்ச் 02, 2016

போயா லூசு!!!

எத்தனை பேர் இதை ஏற்றுக் கொள்ளப் போகிறார்கள் என்று தெரியவில்லை. இன்றைய தினம் நிம்மதியாக இருக்க முடியாது என்று மட்டும் தெரிகிறது.

ஒரு பக்கம் மாற்றுக் கருத்து சொன்னாலே தேசத்துரோகி என்று கூச்சல் போடுகிறார்கள். இன்னொரு புறம் இனத்துரோகி என்கிறார்கள். அரசியல் மெதுவாக சல்லிப்பயல்களின் கைக்குப் போய்க் கொண்டிருக்கிறது. சில தனி மனிதர்களின் பேராசைக்குத்தான், மதம் போலவே இனமும் மொழியும் எடுபிடி ஆகிக் கொண்டிருக்கின்றன என்பதை உணராமலேயே ஒரு பெருங்கூட்டம் அந்த வலைக்குள் விழுந்து கொண்டிருக்கிறது.

என்ன பேசினாலும், உன் அம்மா - அக்கா - தங்கச்சி என்று பதிற்கேள்வி கேட்டு மிரட்டுகிறார்கள். தேதிவாரியாக வந்தேறிக் கணக்கு வைத்துக் கொண்டு சாதியைச் சொல்லித் திட்டுகிறார்கள். எதிர்ப்பு அரசியலைத் தாண்டி பகை அரசியல் மேலோங்கிக் கொண்டிருக்கிறது. அதற்கும், "அவ்வளவு நாகரீகமானவன்னா அரசியல் பேச வராத!" என்று நியாயமான விளக்கங்கள் கொடுக்கப்படுகின்றன.

நல்லது! அடுத்த சில மாதங்கள் அச்சுறுத்துபவையாகவே உள்ளன. அமைதியாக ஒதுங்கிக் கொண்டு விடலாமோ என்றுதான் தோன்றுகிறது. உலகத்துக்கே நாங்கள்தாம் பண்பாடு சொல்லிக் கொடுத்தோம் என்று சொல்லிக் கொண்டு மிருகங்களைப் போலச் சண்டையிடும் நாகரீகந்தான் நமக்குப் புரிபட மறுக்கிறது.

சண்டைக்கு மத்தியில் சுற்றி ஒரு பார்வை பார்த்துக் கொள்ளுங்கள் - யாரெல்லாம் உங்களைப் பார்த்துச் சிரிக்கிறார்கள் என்று. அப்புறம் தெரியும் நீங்கள் எவ்வளவு சரியான பாதையில் போய்க் கொண்டிருக்கிறீர்கள் என்று! வாழ்த்துக்கள்!!

பின்நவீனத்துவக் கவிதை!

"ஐ லவ் யூ" என்றாள்
"ஐ லவ் யூ டூ" என்றேன்
"ஒன்னு இங்க இருக்கு! இன்னொன்னு எங்க?!" என்கிறாள்...

LinkWithin

Related Posts Plugin for WordPress, Blogger...