வெள்ளி, ஜூன் 17, 2016

மொழித்தாய்

வெளியூர்க்காரியே ஆனாலும்
வென்றவளைத் தாயாக்கிக் கொளல்
வெகு எளிது என்றாகிவிட்ட பின்
எவர் உழைப்பார்
வீட்டுக்குள் மாட்டிக்கொண்ட
சொந்தத்தாயை வெல்விக்க?

வேண்டுமானால்
பிடிவாதக்காரர் நீர்
உழைத்து
வெல்வித்துவிட்டு
வந்து சொல்லுங்கள்

உறவு கொண்டாட வருகிறோம்!

செவ்வாய், ஜூன் 14, 2016

மேதாவியர்

எம்மிடமில்லாத
உம் அறிவும் ஆற்றலும்
உம் மீது 
எப்போதும்
பிரம்மிப்பை ஏற்படுத்துகின்றன
ஆனால்
பிழைப்புக்காகக்
குற்றங்கள் இழைக்கும்
எளியவர் எம்மிலும் இழிவாக
உம் மேலான வாழ்வுக்காக
உலக நியாயங்களையெல்லாம்
உம் வசதிக்கேற்றபடி
வளைத்துப் போட்டுக் கொள்ளும்
உம் அறவுணர்வும்
உம் அறிவையும் ஆற்றலையும்
எவ்வளவோ பயன்படுத்தியும்
உம் உள்நோக்கங்களை
ஒளித்து வைத்துக் கொள்ள முடியாமல்
தடுமாறித் தவிக்கும்
வேளைகளில் வெளிப்பட்டுவிடும்
உம் இயலாமையும் போதும்
எம் மீதேறி
எம்புட்டு மேலே தாவிப் போனாலும்
மேதாவியர் உம்மைக் கீழே வீழ்த்த

திங்கள், ஜூன் 13, 2016

காதல் முட்டை

காதலிப்பது உண்மையானால்
அதைக் காட்டிக்கொள்வதில்
என்ன தயக்கம் என்று
கூறுகெட்ட கேள்விகள் கேட்கும்
கூமுட்டைக் காதல்
குஞ்சும் பொறிக்காது
குழம்புக்கும் உதவாது

ஒன்று
உடனடியாக
உடைத்து வீசப்படும்
அல்லது
வீசப்பட்டு
வேறொரு வேளையில்
உடைபட்டு நொறுங்கும்

காதலும்
அதற்கான காலம் கனியும்வரை
அதீத கவனத்தோடு
அடைகாக்கப்பட வேண்டிய
உடைபொருள் என்ற
பண்பாட்டுச் சூட்சுமமறிந்த
பண்பட்ட காதல்தான்
காலங்கடந்து வாழும்
இனம் வளர்க்கும்

ஞாயிறு, ஜூன் 12, 2016

வெளிச்சத்தின் இழப்பு

சுற்றிலும் இளைஞர்களையே வைத்துக் கொண்டாலும்
சுற்றுவதெல்லாம் இளைஞர்களோடே என்றமைத்துக் கொண்டாலும்
முயன்றோ முயலாமலோ
உணர்விலும் உருவிலும்
இளைஞனாகவே இருந்துவிட இயன்றாலுங்கூட
உள்ளுக்குள் ஓடும் கடிகாரம் மட்டும்
அணு அணுவாய்க் கொல்லப்பட்டுக் கொண்டிருக்கும்
இளமையின் இழப்பை
நினைவுறுத்தி நினைவுறுத்தித்
துன்புறுத்திக்கொண்டேதானிருக்கிறது

உச்சி வேளைக்குப் பிந்தைய வெயில்
உச்சிவெயிலினும் பிரகாசமாயிருந்தாலுங்கூட
மாலை நெருங்குகின்றதென்ற கவலையே
அதை அனுபவிக்க விடாமல்
ஆக்கிவிடுகிறதே!

ஆக்கி எங்கே விடுகிறது?
அழித்தல்லவா விடுகிறது!

அந்திதான் அழகென்றும்
வெயிலுக்குப் பிந்தையதுதான்
விளையாடப் பொருத்தமான பொழுதென்றும்
ஆயிரந்தான் ஓதினாலும்
வெயிலோடு போய்விட்ட
வெளிச்சத்தின் இழப்பு பற்றிய கவலைதானே
மாலையையும் பாழாக்கி விடப் போகிறது!

சனி, ஜூன் 04, 2016

நாய்கள் மட்டுமா?

ஊரெல்லாம் வெள்ளம் போனாலும்
நாய் நக்கித்தான் குடிக்கும் என்கிறீர்களே
உங்களுக்கு நன்றாகத் தெரியுமா?
அங்கே
நக்கிக் குடித்துக் கொண்டிருப்பவை அனைத்தும்
நாய்கள்தாம் என்று
நக்கிக் குடிப்பதனாலேயே
அவை நாய்கள்தாம் என்று
உறுதியாகச் சொல்கிறவர்களே!
ஒருமுறை உற்றுப் பாருங்கள்
அவற்றுள்
பசித்தாலும் புல் தின்ன மாட்டோம்
என்று சொல்லிக் கொள்ளும்
புலிகளும் சிங்கங்களும்கூட
நாய்களைவிட
நன்றாகவே நக்கிக் குடித்துக் கொண்டிருக்கின்றன!

வரலாறு

உன் முன்னோர்கள் எல்லோரும்
நான் படித்த வரலாற்றில்
நாயகர்கள்
அவர்களை
அப்படிக் காட்டிய பெருமை
உன்னையே சேருமென்றார்கள்
அது எனக்குப் புரியவில்லை
நான் பார்த்த வரலாற்றில்
பலருக்கு நீ நாயகன்
பலருக்கு நீ பாவி
உன் காலம் முடிந்தபின்
என் பிள்ளைகள் படிப்பதற்காக
எழுதப்பட்ட வரலாற்றில்
நீயும்
கேள்விகட்கப்பாற்பட்ட நாயகனாக
உயர்ந்து நிற்கிறாய்
அவர்கள் படிக்கும் வரலாற்றை
நான் பார்த்த வரலாறு கொண்டு
கேள்விக்குட்படுத்த விரும்புகிறேன்
ஆனாலும்
அதற்கெல்லாம் எங்கே
நேரமிருக்கிறது?
இருந்தாலும்
இதெல்லாம்
நான் படித்த வரலாற்றையும்
கேள்விக்குட்படுத்த உதவியிருக்கிறது
நன்றி நாயகா!

கடைசி விடை

மனிதனுக்கு
பிரபஞ்சத்தைப் பற்றி
ஏகப்பட்ட வினாக்கள்
தன்னைப் பற்றி
அதை விட அதிகமான வினாக்கள்
விடையளிக்கப்படாத வினாக்களுக்கெல்லாம்
ஒரே விடையாய்
உயர்ந்து நிற்கிறார்
கடவுள்
வந்து சேரும்
ஒவ்வொரு விடையும்
அவரின் உயரத்தைக்
குறைக்க முயல்வதும்
எழுப்பப்படும்
ஒவ்வொரு புது வினாவும்
மீண்டும் அவரை
மேலே ஏற்றுவதுமாக
நீண்டுகொண்டே இருக்கிறது
விவாதம்
கடைசி வினாவும்
எழுப்பப்பட்டு
அதற்கான விடையும்
விளக்கப்படும் வேளையில்தானே
கடவுளுக்கும்
அறிவியலுக்கும்
வேலை முடியும்
அதற்குப் பின்னும்
மனிதனுக்கு மட்டுமா
வேலை இருந்துவிடப் போகிறது
பிரபஞ்சத்தில்?!

புதன், ஜூன் 01, 2016

பலசாலி

தனி ஆளாக
நாலு பேரைக் கூடச்
சாய்த்து விடுவார்
கருப்புச் சித்தப்பா

எவருக்கும் பயப்படாத
ஏட்டையா கூட
அவரைக் கண்டால்
பயப்படுவார்

அவரைவிடப் பலசாலி
எவரையும் நான்
இதுவரையும் கண்டதில்லை

முரட்டுப் பூனைக்கு
மணி கட்டப் போகும்
மணிகண்டன் யாரோ என்று
ஊரே காத்துக் கிடந்தது

சித்தப்பா
இன்று
வீடு திரும்பி வந்து
கதவைப் பூட்டிக் கொண்டு
கதறிக் கதறி அழுகிறார்

போன வருடம்
வெளியூரிலிருந்து
வேலைக்காக வந்து குடியேறிய
ரமேஷ் சார்
தன்மையானவர்
பயந்த சுபாவம்
எப்போதும் சிரித்த முகம்
யாரோடும் அதிர்ந்துகூடப் பேச மாட்டார்

எங்கோ
ஏதோ
எழுதிப் போட்டு
இவருக்கும்
இவர் போலப் பலருக்கும்
வேலையே இல்லாமல் செய்து விட்டாராம்...
தனி ஆளாக...

காஸ்ட்லி ஆசை

இளையவன்
அது வேண்டுமென்று கேட்டு
இரண்டு மூன்று மாதங்கள் ஆகிவிட்டன

இந்த மாதமும்
கையைக் கடிப்பதால்
அடுத்த மாதச் சம்பளம் வரை
காத்திருக்க வேண்டும் போல் தெரிகிறது

வேலைக்காரம்மா வீட்டு இளையவனும்
அது வேண்டுமென்று கேட்டு
அடம் பிடித்தழுதான் அன்று

அவரோ
மூத்தவன்
படித்து முடித்து
வேலைக்குப் போய்
முதல் மாதச் சம்பளத்தில்
வாங்கிடலாம் என்று
சொல்லித் தேற்றிவிட்டார்

எங்கள் வீட்டு மூத்தவனைப் போலவே
இரண்டு வருடந்தான் மூத்தவன்
அவனும்!

LinkWithin

Related Posts Plugin for WordPress, Blogger...