வியாழன், ஏப்ரல் 14, 2016

மறுதலிப்பு

நீ
என்னை நிராகரித்ததும்
நான் மண்டியிட்டு வேண்டி நின்றதைத்
தர மறுத்து அவமதித்ததும்
நல்லதாகத்தான் போயிற்று

அதற்கான காரணம் எதுவென்று
இன்றுவரை சரியாகப் புரியவில்லை

அப்பெரும் பொருளுக்கு
நான் தகுதியற்றவன் என்று
கருதியிருக்கலாம்

தாமதித்துக் கொடுத்தால்தான்
அதன் தரமும் அருமையும் புரிபடும் என்று
எண்ணியிருக்கலாம்

நான் கேட்ட விதம்
மற்றவர்களுடையதைப் போல்
உன் பெருமைக்குப் பெருமை சேர்க்கும் விதமாக
இல்லாமல் இருந்திருக்கலாம்

எது எப்படியோ
உன் முடிவு
நம் இருவருக்குமே
நல்லதாகத்தான் போயிற்று

தகுதியில்லாதவனுக்கோ
தராதரம் தெரியாதவனுக்கோ
தந்து விட்டோமோ என்ற
வாழ்நாட் கவலை
உனக்கும் இல்லாது போய்விட்டது

அதைவிடப்
பெரும் பெரும் பொருட்களையும்
அரும் பெரும் இடங்களையும்
அடையும் தகுதியும்
அதற்காகத் தவம் கிடக்க வேண்டிய
அவசியம் இல்லாத தராதரமும்
எனக்கு இருக்கிறது
என்பதைப் புரியாமலே
என் வாழ்வும் ஓடியிருக்கும்

நீ தர மறுத்தது
எனக்கு மட்டுமே உன்னால் தர முடியாத
இயல்பான இயலாமையாகக் கூட இருக்கலாம்

அல்லது
உன்னிடம் எப்படிப் பெற வேண்டும் என்ற
என் அறியாமையாகவும் இருக்கலாம்

உன் இயலாமைகள் யாவும்
உலகத்தின் இயலாமைகள் அல்ல என்றும்
உன்னிடம் பெற இயலாமை ஒன்றே
என்னுடைய முழு இயலாமை அல்ல என்றும்
உனக்கு வெளியே
உன்னிலும் அழகான உலகம் ஒன்று உள்ளது என்றும்
நானும் கூட
அந்த உலகத்துக்கு
உனக்கை விட அழகாகப் படுவேன் என்றும்
உணர்த்தித்தான் விட்டது
இந்த ஒற்றை மறுதலிப்பு!

கருத்துகள் இல்லை:

கருத்துரையிடுக

நேர்காணல்: தட்பவெப்ப மாற்றத்தின் புதினங்கள், வணிகம் மற்றும் சமூகவியல் பற்றி அமிதவ் கோஷ்

நேர்காணல்: தட்பவெப்ப மாற்றத்தின் புதினங்கள், வணிகம் மற்றும் சமூகவியல் பற்றி அமிதவ் கோஷ் ‘தட்பவெப்ப மாற்றப் புனைவுக்கென்று தனி வகைமை இரு...